A
FINENI’NA NA TINAITAI Ex 22, 20-26
Un tinaitai ginin i Lepblun Exodus
Taiguini ilekña i Saina:
“Cha’-miyu mumattrårata osino heheñu’ påpa’ i istrangheru, sa’ ginin un tiempu manistrangheru hamyu gi tanu’ i ManIhipto. Cha’-miyu mumattrårata ni håyi na bi’uda osino i manaisaina na famagu’un. Yanggin siakåsu na en mattråta siha ya ma’ågang Yu’, siguru na siempri Hu hunguk i inagang-ñiha. Siempri fumigan i linalalo’-hu, ya bai Hu punu’ hamyu ni sapbli; taiguennåo na siempri mambi’uda i asaguan-miyu, yan i famagu’un-miyu manaisaina.
“Yanggin manna’ayåo hamyu salåppi’ para un popbli na bisinu gi entalu’ i taotåo-hu, cha’-miyu cheche’gui taiguihi i mannana’ayåo salåppi’ ni mandimåmanda intires ginin siha. Yanggin en ge’ti i magågun i prohimu put i para en na’siguru na inapåsi håo tåtti, debidi en na’na’lu tåtti åntis di u måtchum i atdåo; sa’ esti ha’ na magågu para tampen-ña. Håfa ottru magagu-ña para maigu’? Yanggin ha ågang Yu’, siempri bai Hu hunguk gui’; sa’ yo’asi’ Yu’.”
I finu’ i Saina.
INEPPIN I SÅTMU Ps 18, 2-3. 3-4. 47. 51
R. (2) HU GOFLI’I’ HÅO, O ASAINA, HÅGU I MINETGOT-TU.
Hu gofli’i’ Håo, O Asaina, Hågu i fuetsåk-ku.
O Asaina, Hågu i atcho’-hu, i fanliheng-hu yan i nana’librek-ku.
INEPPI….
Yu’os-su, Hågu muna’a’attuk yu’ na åtchu’,
Hågu i pattang-hu, i sumåtba yu’ na kånghilun, i fanatok-ku!
Umessalåo yu’, u matuna i Saina,
esta mana’såfu yu’ ginin i maninimigu-hu.
INEPPI….
Låla’la’ i Saina yan u matuna i Atcho’-hu!
U mana’takkilu’ si Yu’us i nana’librek-ku.
Hågu muna’fanggånna mandångkulu na gera i rai,
ya kariñosu Håo ni atyu i Un olius.
INEPPI….
SIGUNDU NA TINAITAI 1Thes 1, 5c-10
Un tinaitai ginin i fineni’na na Kattan San Pablo para i taotåo ‘Thessalonica’
Hafañe’lus:
Hamyu en tingu’ ha’ taimanu lina’la’-måmi anai iståba manhihita; para i minaolik-miyu ha’ atyu siha. En dalalaki i ihemplun-måmi yan i Saina; ya maseha meggai minaså’pit-miyu, en risibi ha’ kun minaguf i minsåhi ni mafåttu ginin i Espiritu Såntu. Intonsis manhuyung hamyu ihemplu para atyu siha i manmanhonggi giya ‘Macedonia’ yan ‘Achaia’. Ti put i minsåhi ha’ put i Saina humuyung ginin hamyu para todu iya ‘Macedonia’ yan ‘Achaia’, låo kuntodu i nutisia put i hinenggin-miyu gi as Yu’us måttu gi todu i lugåt. Intonsis tåya’ mås para bai in tingu’. Todu atyu siha na tåotåo masåsangan taimanu hamyu na en risibi ham anai in bisita hamyu, yan taimanu na en bira hamyu ginin i manma’adoran i mamfåtsu na yu’us para guatu gi as Yu’us, para en setbi i magåhit yan låla’la’ na Yu’us yan para u manangga i finattun i Lahi-ña ginin i langit–i Lahi-ña as Jesus, ni Guiya muna’lå’la’ ginin i finatai ni Guiya rumiskåta ham ginin i linalålu’ Yu’us ni para u fåttu.
I finu’ i Saina.
IBANGHELIU Mt 22, 34-40
ÅLELUIA Jn 14. 23
R. Åleluia. HÅYI GUMUAIYA YU’, SIEMPRI HA OSGI I FINA’NA’GUEK-KU, YA U GUINAIYA GUI’ AS TATÅ-HU, YA BAI IN FANMÅTTU GUATU GIYA GUIYA.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Anai mahunguk ni MamFarisehu na Ha na’fanmamatkilu si Jesus i ‘Sadducees’, manetnun siha; ya unu giya siha, era un abugåo, put i para u na’kegoddun si Jesus, ha faisin Gui’, “Ma’estru, håfa mås takkilu’ na tinagu’ gi Lai? Ineppi gui’ as Jesus, ” ‘Gofli’i’ i Saina i Yi’os-mu yan todu i kurason-mu, yan todu i anti-mu, yan todu i hinassom-mu.’ Estigui’ i mås takkilu’ yan i fineni’na na tinagu’. Uma’achuli’ esti yan i sigundu: ‘Gofli’i’ i prohimu-mu taiguihi i un gofli’i’ håo.’ Esti i dos na tinagu’ fundasion todu i Lai, yan kuntodu i mamprufeta siha.”
I Ibangheliun i Saina.
First Reading & Responsorial Psalm: Mrs. Rita C. Guerrero
Second Reading: Mrs. Margaret C. Dela Cruz
Gospel: Deacon Rosiky F. Camacho
